*  *  *

Cretonnée de pois nouveaulx ou feves nouvelles. Cuisiez-les jusques au purer, et les purez, puis prenez lait de vache bien frais, et dictes à celle qui vous le vendra qu’elle ne vous le baille point s’elle y a mis eaue, car moult souvent elles agrandissent leur lait, et s’il n’est bien frais ou qu’il y ait eaue, il tournera. Et icelluy lait boulez premiérement et avant que vous y mettez riens, car encores tourneroit-il puis broiez premiérement gingembre pour donner appétit et saffran pour jaunir : jasoit-ce que qui le veult faire lyant de moieulx d’œufs filés dedans, iceulx moieulx d’œufs jaunissent assez et si font lioison, mais le lait se tourne plus tost de moyeubc d’oeufs que de lioison de pain et du saffran pour coulourer. Et pour ce, qui veult lier de pain, il convient que ce soit pain non levé et blanc, et sera mis trempé en une escuelle avec du lait ou avec du boullon de la char, puis broyé et coulé par l’estamine; et quant vostre pain est coulé et vos espices non coulées, mettez tout boulir avec vos pois; et quant tout sera cuit, mettez adonc vostre lait et du saffran. Encores povez-vous faire autre lioison, c’estassavoir des pois mesmes ou des féves broyées, puis coulées; si prenez laquelle lioison que mieulx vous plaira.
Car quant est de lioison de moieulx d’œufs, il les convient batre, couler par l’estamine, et filer dedens le lait, aprés ce qu’il a bien boulu et qu’il est trait arriére du feu avec les pois nouveaulx ou fèves nouvelles et les espices.